موقف مؤثر حصل في حيااتي

صار لي موقف يوم الاربعاء بتاريخ:22/7/1430

كان ابوي رايح يعزي لواحد من اقاربنا توفى ولده بحادث وعمره 15 سنه
بعد ماخلص العزاء قال يبي يرجع فقال ولد عمي لابوي بروح معك للرياض قال له كلم اهلك فوافقوا اهله
ووصلوا للرياض ولله الحمد المهم..بعد3 ايام تقريبآ كنا سهرانين ونستهبل ونلعب بلاي ستيشن
وكنا سهرانين لين الظهر وبعدهاقال يلا نروح ننام عشان نصحى نتغدى قلناطيب طبعآانا واختي واخوي
وبعدها راح يبي ينام فجاني وقال لي تبين شي قلت لا سلامتك وراح ينام بعد ماطلع من عندي تضايقت وجلست ابكي
مو عارفه ليه وبالغصب نمت الساعه 7 الا ربع والساعه 7 تمااام صحيت على صراخ امي واختي
مفجووعه
قلت وشفيكم قالت امي لاختي اسكتي لاتقولين لها فصارخت على اختي وقلت وشفيه قاالت لي؟؟
خالد مات قلت من خالد طبعآ لان عندنا خالد اخوي وولد عمي وولد عمتي فقالت ولدعمي والله موعارفه
كيف شلت نفسي ورحت اشوفه طبعآمن قوة الصدمه مابكيت على انهم كلهم كانوا يصارخون ويبكون
ومع هذا كنت متحمله ومابكيت المهم..
اتصلنا على اخواني وكلهم جو منصدمين وبعدها شافوه ميت وجلسو يصارخون ويبكون مو مصدقين
نام وهو مستانس وماكان تعبان ولا شي بس ربي حب ياخذه من هالدنيا المره عشان يريحه وبعدها
اخذوه للمستشفى وقال الدكتور مات موته طبيعيه ودفنوه طبعآ الصدمه الاكبر ان اخته قبل لايموت
بثلاث اشهر توفت بعدين خليناهم يكشفون طلع فيهم شحنات بالقلب زايده عشان كذا كل شوي متوفي واحد منهم
واللي مضايقني اكثر ان بنات اختي يحملون هالمرض لان اختي متزوجه ولد عمي وبس....
طبعآهالموقف مؤثر فيني بالمره فحبيت انقله لكم طبعآبقلمي انا مفاهيم الخجل والله انها حقيقه
والله ماقلتها عشان اتصنع واتميز بس والله خطتها يميني لكم بتعب عشان يمكن دعواتكم
تشفيهم من بعد الله واسف على الاطاله واتمنى دعواتكم لبنات اختي وعمي وعمتي وبناتهم..
وبعد وفاة خالد ولدعمي كتبت مرثيه بمساعده من ابوي طبعآ الله يخليه لي يارب..آميين..
"اخليكم مع المرثيه"
بسم الله الرحمن أسأله وأرجيه .. بسم الله المبدأ وختم المقالي
الله يجعل ماعملناه يرضيه .. من عرشه بسابع سما فوق عالي
الله يسمع دعوتي كل مدعيه .. وبكل ما أطلب ياولي منك انالي
يامنهو لمطلوب عبده يراعيه .. تلهم لخالد في جواب السوالي
وأطلب عسا أعماله بمرضات واليه .. ويرحم لخالد من على العرش عالي
وعسا جميع أعمال الخير يجنيه .. ويالله بحاله لطف والطف بحالي
صاحت على حظ المعنى لياليه .. خالد علي ناحت عليه الليالي
هلي دموعك ياعيوني وناديه .. وياقلبي اصرخ واحتمل ماجرالي
خالد رحل لكن ماراح طاريه .. ماراح عن قلبي وروحي وبالي
أبكي عليه اليوم بإسمي وأسميه .. خالد علي من جد عم وخوالي
ياجنة الرحمن هلي وضميه .. وتذكري غالي بكى فقد غالي
خالد علي وان قلت وش لون بأرثيه .. ارحم لخالد ياعزيز الجلالي
مافاد قلبي كل من جا يواسيه .. من جا يواسيني عجز ماقوالي
قلبي بعد خالد همومه تباريه .. الله من هم بقلبي صطالي
خالد فراقه ما ضميري بناسيه .. ابكيه وابكي الأربعا ماجرالي
يالله تصبرني وللقلب تهديه .. ياخالقي لك عليك اتكالي
يالله عسى سيرته عطره بماضيه .. وعساه في الأخرى سعيد وعسالي
ياله طلبتك من جهنم تنجيه .. وتجيرنا وياه يوم الهوالي
ومن العذاب اطلب الله يحميه .. الواحد اللي مالغيره نسالي


محبتكم الحزينه:
مفاهيم الخجلN

كل الشكر لكـِ ولهذا المرور الجميل

الله يعطيكـِ العافيه يارب

خالص مودتى لكـِ

وتقبلي ودي واحترامي
يسلمو اختي الغاليه

والله يسمع دعوتك

آمين ياااارب